IMA_roomaan.txt

DELHI

“India lea vearrámus báiki, gos sáhtát álggahit mátkki máilmmi
birra.” Indialaš nissona sánit čudjet oaivvis, go oččodan nahkáriid
hoteallaseaŋggas Delhis. Son dušše šluvggašii oaivvi Frankfurta
girdingiettis, go gulai gosa lean mannamin.

Lean oađđán dušše moadde diimmu. Moráhallen oppa áigge.
Jovden Delhii ihkku njealji áigge. Ledjen várren hoteallalanja
ovddalgihtii, muhto in suitte orrut dás go ovtta ija. Ii leat go
čohkket dávviriid lávkii ja vuolgit. Lean duđavaš go mus lea fárus
iPad ja hoteallas lea WiFi. Lean dutkan neahtas guosseviesuid,
muhto jearralan maid hotealla resepšuvnnas, dihtetgo sii hálbbes
muhto dohkálaš orrunsaji gávpoga guovddážis.

Válddán táksi hotealla rávven guossevissui. Dán vuoru albma
čáhppesfiskes táksi. Dakkáriin livččen galgan boahtit ihkkuge
girdingiettis hotellii, muhto nu ii šaddan. Máksen táksi ovddalgihtii
nugo galgenge. Girdingietti almmái ávžžuhii mu váldit
dušše čáhppesfiskes táksi. Earát eai leat lobálaččat. Go jovden
olggos, de in áican čáhppesfiskadiid gosge. Ledjen nu čađa váiban,
ahte loahpas dohkkehin muhtin albmá fálaldaga doalvut
mu hotellii. Ballen issorasat gosa dat doalvu mu. Jallašin iežan,
go vulgen nu sahtedohko. Lihkus buot manai bures, dahje oalle
bures. Hotealla olggobealde vuoddji dáhtuhišgođii lasi ruđa.